КУЛА – Дзеци з дзецинскей заградки „Лампащик” ПУ „Бамби” з Кули, предводзени зоз заменїцу директора тей установи Снежану Булатович, вчера нащивели предсидателя Општини Кула Перицу Видеканїча.
Нащива орґанизована з нагоди Дзецинского тижня, а дзеци ше предсидательови питали о рижних темох, найвецей о тим кеди будзе збудовани нови базен за купанє у Кули. Видеканїч гварел же барз дзба и о думаню наймладших и же ше потрудзи сполнїц їх жаданя.
У Малей сали СО Кула з тей нагоди пририхтане друженє и послуженє за „бамбийовцох”, як и пригодни дарунки, а дзеци предсидательови Општини тиж дали символични дарунок.