ДЮРДЬОВ – У рамикох 25. Дньох Миколи М. Кочиша у дюрдьовскей Основней школи „Йован Йованович Змай” вчера отримана програма на хторей школярки рецитовали писнї и здогадли на живот и роботу родом Дюрдьовчана Миколи М. Кочиша, алє и його уплїв на нєшкайше школованє на руским язику.
З тей нагоди найвреднєйшим читачом кнїжкох зоз школскей библиотеки заступнїца Дружтва за руски язик, литературу и културу (Дружтво) Ирина Папуґа уручела припознаня з меном тиж родом Дюрдьовчанки „Амалиї Хромиш”, а достали их Ксения Вереш, Мария Горняк, Єлена Мудри, Мария Барна, Єлена Горняк и наставнїк виронауки котри роби и у библиотеки Данил Задрепко.
Предсидатель Управного одбору Дружтва Владимир Салонски професорки руского язика и литератури, наставнїци у дюрдьовскей Школи Мариї Самарджич уручел Плакету „Проф. Гавриїла Г. Надь”, за доприношенє васпитно-образовней роботи и популаризованю руского язика и литератури медзи школярами, родичами и у дружтвеним штредку. Самарджичова у Школи у Дюрдьове роби уж 23 роки.
У другей часци програми Ирина Папуґа воспитачки у дюрдьовскей ПУ „Дюрдєвак” Марини Сабадош уручела кнїжку новей музичней творчосци за дзеци „Черне пупче 1969-2012”, а потим представела нови виданя Дружтва, хтори подаровани и школскей библиотеки.
На програми у рамикох Дньох Миколи М. Кочиша присуствовали школяре нїзших и висших класох ОШ котри виучую руски язик, директорка ОШ Мария Тртич, учительки Мелания Саламун и Єлена Салаґ, наставнїца сербского язика Даниєла Самарджич и наставнїца руского язика и литератури котра преподава у Новим Садзе Ванеса Медєши.
