КУЛА – У ОШ „Петефи бриґада” у Кули штварток, 18. юния, шветочно додзелєни свидоцтва 26-ерим школяром Функционалного образованя одроснутих („Друга шанса”), з котрих 17-еро закончели 3. циклус, односно основне образованє. Медзи нїма и шесцеро Керестурци – Ева Панич, Радмила Шайтош, Милева Хатнадь и Соя Новакович, котри и похвалєни з дипломами за окремне закладанє, успих и коректне одношенє, а Нада Йованович закончела 2. циклус.
Присутних привитала помоцнїк директора Школи Снежана Кнежевич, а то уж треци рок як спомнута кулска Школа орґанизує образованє за одроснутих, як єдна з 5 школох у Заходнобачким округу. Дотераз 131 школяр достал свидоцтво о законченим єдним з трох циклусох, а 55-еро закончели треци циклус (7. и 8. класу ОШ). Од октобра 41 одроснути школяр почнє обуку у фахових школох, а прешлого року за тото достали и пенєжне надополнєнє. За шицких котри нє з Кули бул орґанизовани безплатни превоз на наставу.
Заинтересовани котри жадаю закончиц основне образованє можу ше явиц на телефон школи 723-944, андраґоґови Снежани Радоєвич.
Настава почнє штредком октобра, а будзе орґанизовани и безплатни превоз з Руского Керестура до Кули.