ДЮРДЬОВ – Ловарске дружтво (ЛД) „Заяц” з Дюрдьова од початку сезони лову 15. септембра, та по прешли викенд, до дюрдьовского хотара пущело 400 фазани на седем места, хтори у новей фазанериї ловаре виховали за три мешаци. Векша часц фазанох будзе одштрелєна, а єдна часц будзе зохабена за природни приплод.
Як гварел предсидатель ЛД „Заяц” Владо Остоїн, фазанчата купени концом юлия у Фазанериї „Ристовача код Бача” ЯП „Войводиналєси”, кед мали коло шейсц тижнї и ховали их у новей фазанериї поконцу Дюрдьова.
За вибудов фазанериї, студньох за воду, за набавянє и поставянє соларного панелу за фазани и за поживу, дюрдьовским ловаром помогнул Покраїнски секретарият за польопривреду, водопривреду и лєсарство з коло 300 000 динари, а до тей инвестициї ЛД уложело и власни средства, коло 500 000 динари.