РУСКИ КЕРЕСТУР – До манастирского дому Провинциї Св. Йосифа шестрох служебнїцох НДМ у Руским Керестуре, всоботу, 18. юния, сцигла путуюца икона блаженей шестри Йосафати Гордашевскей з єй мощами, дзе останє по 20. новембер того року, а з икону шестри нащивя парохиї у нашим Егзархату,
Икону ш. Йосафати до Керестура принєсли шестри з провинциї у Словацкей, а прияла ю провинцийна настоятелька Вероника Гралюк. У присустве велького числа шестрох з вецей сушедних манастирох, вона ю поставела опрез олатру у манастирскей каплїци, дзе потим керестурски парох о. Михайло Малацко одслужел Молебен до блаженей Йосафати.
Як дознава Рутенпрес, шестри уж внєдзелю икону однєсли на свойо духовни вежби до Горґошу, од вчера икона будзе на парохиї у Кули, а потим и у других наших парохийох.
Путуюца икона з мощами блаженей шестри Йосафати специялно виробена же би путуюци по швеце обєдинєла шицки седем провинциї ш. служебнїцох, та же би вирни цо баржей упознали їх сновательку и могли ше помодлїц пред икону за заступнїцтво ш. Йосафати.
Путуюца икона на драгу по швеце рушела 2013. року з Бразилу, ишла по Южней и Сиверней Америки, одкаль сцигла до Европи. Перше пребувала у Словацкей, одкаль сцигла до Сербиї.
