РУСКИ КЕРЕСТУР – До першей класи Штреднєй школи „Петро Кузмяк” у Руским Керестуре розпоредзени вєдно 73-йо школяре, цо рекордне число за остатнї роки. До руского оддзелєня Ґимназиї розпоредзени 14, до сербского 29, а до напряму Туристични технїчар 30 школяре.
Як Рутенпрес дознава у управи Школи, окрем єдного школяра, керестурска Школа шицким другим була на першим месце на лїстини жаданьох, а у обидвох оддзелєньох Ґимназиї векшина розпоредзених одлични школяре.
Попри векшини Керестурцох, у руским оддзелєню по длугшим чаше знова и єден школяр з Коцура, а тиж и єден з Червинки.
Того року специфичне и барз вельке число школярох у сербским оддзелєню Ґимназиї, а знова максималне число будзе мац оддзелєнє напряму Туристични технїчар.
Резултати розподзелєня школярох нєшка виложени у Школи „Петро Кузмяк” и на сайту Министерства просвити, а упис будзе ютре и поютре, 5. и 6. юлия.