КУЛА – У Општинским одборе Сербскей напредней странки (СНС) у Кули вчера отримана конференция за медиї на хторей сообщене же до СНС прешли дотерашнї члени Зєдинєних реґионох Сербиї и Демократскей странки Сербиї (ДСС).
Нови члени СНС постали терашнї заменїк предсидателя Општини Кула Велибор Милоїчич и директор Туристичней орґанизациї Општини Кула Владимир Станкович, дакедишнї члени странки Зєдинєни реґиони Сербиї, та директор Фонду за защиту животного штредку Блажо Костич и директор кулского ЯП „Комуналєц” Дамян Милянич, котри були и функционере у Општинским одборе ДСС.
Нових членох привитал предсидатель кулского Одбору СНС Перица Видеканїч, а на конференциї за новинарох визначене же, на основи посцигнутих резултатох од кеди СНС, вєдно з коалицийнима партнерами на власци у општини, обчекую же после наступних локалних виберанкох СНС будзе мац абсолутну векшину у Кули, як и же после виберанкох на уровню Войводини, СНС будзе предводзиц Покраїнску владу.