СРИМСКА МИТРОВИЦА – До Львова и Києва вчера сцигла треца тура гуманитарней помоци за интерно розселєних и тих цо загрожени од пошлїдкох войни у України, а акцию иницировали грекокатолїцка церква (Каритас) и инициятивна ґрупа гражданох Сербиї. Єден полни комби у тей тури превезол помоц зоз Сримскей Митровици, як и часц помоци зоз Шиду, Бикичу и Беркасова.
У акциї збераня гуманитарней помоци по войводянских парохийох, од априла по май того року, назберани коло штири тони насапредз шмати, ствари особней гиґиєни и тирвацши поживово продукти.
У скорейших двох турох превежена помоц з местох у Бачкей – з Керестура, Кули, Вербасу и Коцура, та з Индїї, а дистрибуована є тим котрим була потребна у Ивано Франковску, Києве и Львове.
Орґанизаторе акцию збераня гуманитарней помоци оценюю як барз успишну, прето же ше рихтали превесц лєм тону, а назберане штири раз вецей. Остало ище превесц єдну штварцину помоци.
Спрам подакох УНИЦЕФ-у, у України пре анексию Криму и войну у Донбасу тераз єст коло 1,5 милиони интерно розселєни особи. Воєни конфликт на востоку держави потрафел коло пейц милиони людзох, з котрих 1,7 милиони дзеци.