РУСКИ КЕРЕСТУР – После першого шнїгу тей жими самим концом прешлого рока, у Руским Керестуре вчера скоро цали дзень, а потим и вноци, нєпреривно падал густи и досц мокри шнїг, алє без витру.
ЯКП „Руском” уж вчера пред вечаром з розгартачами на огньогасним камионє и двох тракторох почало роздрильовац шнїг по валалских улїцох, на паркинґох у центре валалу, опрез каплїчки, на автобускей станїци и на других просторох опрез явних обєктох, же би нєшка рано улїци цо баржей були преходни.
Як Рутенпрес дознава од директора „Рускому” Иґора Фейдия, екипи дежурали и вноци, та можлїве же чисценє шнїгу будзе предлужене и нєшка рано, а у случаю же напада вельке количество шнїгу, пополадню буду чисциц крижни драги и дражки у центре валалу, цо плановане поробиц на пондзелок.
Маґистрална драга медзи Кулу и Оджаком уж вчера вечар и вноци вецейраз чисцена, посипана по нє и соль, так же є преходна.
