РУСКИ КЕРЕСТУР – Одлука Вивершного одбору (ВО) Националного совиту (НС) Руснацох о розподзельованю средствох проєктом и програмом з хторима нашо КУД, установи и орґанизациї конкуровали на Конкурс Покраїнского секретарияту за културу и явне информованє єдногласно прилапена на схадзки НС Руснацох, 28. марца у Керестуре.
Слово о розподзельованю милион и пол динари, кельо за нашу заєднїцу по тим конкурсу опредзелєл спомнути Секретарият, а по тей одлуки ВО опредзелєни су за 13 проєкти и програми, односно фестивали.
Векшу дискусию на схадзки виволало опредзелєнє же би Видавательна дїялносц „Руского слова” у тим року обявела „Антолоґию українскей драми” Людмили Попович, цо у Одлуки ВО о розподзельованю средствох по другим Конкурсу Покраїнского секретарияту за културу и явне онформованє – за видавательну дїялносц у нашей заєднїци, з хторим, попри кнїжкох, облапени и часописи.
Дзепоєдни члени Совиту мали пригварку лєм на тот проєкт, за хтори член НС и редактор Видавательней дїялносци „Руского” Микола Шанта гварел же є „ексклузивни и викрок з наших рамикох у културних гранїцох”. Наглашел же то питанє култури и литератури, а нє политки.
После розправи, Одлука ВО о розподзельованю средствох по тим конкурсу прилапена з 13 гласами „за”, єдним „процив” и єдним „стриманим” гласом.
Централна шветочносц з нагоди Националного швета Руснацох у януаре 2016. року будзе у Кули, 2017. у Бикичу, а 2018. року у Суботици, єдногласно одлучене на соботовей схадзки Совиту, як цо єдногласно потримана и Одлука о додзельованю позарядових стипендийох Татяни Ґовля и Марияни Колошнянї, матурантком руского оддзелєня керестурскей Ґимназиї котри того викенду участвовали на Европскей математичней конференциї штредньошколцох у Атини, у Греческей.
У складзе зоз законскима предписанями, а на основи консултацийох о дотерашнєй потримовки виучованю руского язика у їх школох, НС Руснацох потвердзел позитивне думанє ВО на вибор Милорада Чудича за директора ОШ „Иво Лола Рибар” у Новим Садзе и Рахмана Тиґаня на вибор за директора ОШ „Бранко Радичевич” у Савиним селу.
Пре процедуралну пременку, понеже НС вецей нє ма Предсидательство, алє Вивершни одбор, у тим смислу вименєни Правилнїк о хасноваюн службеного авта Совиту, а на схадзки бешедоване и о дальшим розполаганю з квартельом Совиту у Новим Садзе. Одлучене же спред НС його член Миломир Шайтош оснує трочлену комисию, хтора оценї можлївосци за його предаванє, лєбо видаванє, и предложи их на одлучованє НС.
Пре нєдавну вияву предсидателя НС Славка Раца у емисиї „Културна панорама” Радио Нового Саду же зме за остатнї роки нє мали нови хореоґрафиї, реаґовал Миломир Шайтош, придал му список своїх нових хореоґрафийох и вимагал пребаченє, цо му Рац виражел и на схадзки, и явно – прейґ медийох.