КУЛА – Виберанкова лїстина за локални виберанки у кулскей општини „Проф. др Велибор Васович-Социялистична партия Сербиї” (СПС) всоботу, 16. априла, у Кули отримала свою закончуюцу предвиберанкову трибину.
На трибини присуствовали и визначни госци зоз СПС и других странкох -предсидатель Покраїнского одбору (ПО) СПС Душан Баятович, подпредсидатель ПО СПС Марко Ровчанин, секретар Вивершного одбору ПО тей странки Иван Дьокович, член Предсидательства Главного одбору ПО СПС проф др Павле Будаков, член Вивершного одбору ПО СПС Бранко Чурчич, предсидатель Комунистичней партиї Сербиї Йошка Броз, координатор тей партиї за Войводину Йованка Чолак и ґенерал Милош Дьошан.
Ношитель општинскей лїстини СПС-у др Велибор Васович визначел же особи з лївици нє можу сцекнуц од своїх прешвеченьох, а то гумани одношеня медзи людзми, як и же уложи остатню капку креви же би, вєдно з Душаном Баятовичом и Ивицом Дачичом, до кулскей општини приведол инвеститорох.
Душан Баятович на трибини у Кули гварел же нїґда школство и здравство нє були безплатни, як цо то понукаю други, а же ше СПС будзе бориц же би хорому було доступне здравство, а мудрому школованє. Визначел же ше СПС заклада за праведне розподзельованє дружтвеного богатства и подзвигованє економиї.