ВЕРБАС – Нєзадовольни з динамику виплацованя плацох, хтори ше виплацує з општинского буджету, заняти у Предшколскей установи „Бошко Буха” з Вербасу вчера опрез будинку Општини отримали мирни протест, з поруку „Сцеме лєм тото цо маю шицки Предшколски установи у Сербиї”.
Сход потримали и предсидатель Одбору дїялносцох култури Синдикату образованя, науки и култури Войводини Лазар Попара, предсидателька Одбору дїялносци предшколских установох Войводини Дюрдїца Врбашки, предсидателька Синдикату занятих у образованю, науки и култури Войводини Дюрдїца Црвенко, як и предсидатель Самостойного синдикату у Вербаше Ґоран Роґанович.
Орґанизация Самостойного синдикату ПУ „Бошко Буха” сообщела же з протестом сце упознац явносц з чежким материялним положеньом занятих у тей установи, док скоро шицки предшколски установи у Сербиї заробки доставаю без пожнєня.
Представителє синдикатох вошли до Општини, алє понежє нє нашли нїкого од компетентних, свойо писмени вимоги придали занятим у Општини.
На централней площи опрез Општини приключели ше им и потримали их и велї гражданє, родичи дзецох, як и дзепоєдни заняти у Културним центре, Библиотеки „Данило Киш” и Информативним центре, после чого ше мирно розишли.