МИКЛОШЕВЦИ – На порядней рочней Скупштини КУД „Яким Ґовля” у Миклошевцох, хтора отримана всоботу, 28. фебруара, предсидатель Дружтва Желько Лїкар у звиту о прешлерочней роботи гварел же зарисовани плани сполнєти, а зазначени аж 38 наступи членох КУД.
Шицки три секциї – шпивацка, дзецинска танєчна и рецитаторска робели цали рок, наступали у валалє, по местох Вуковарско-сримскей жупаниї и других у Горватскей, алє и у иножемстве. Лїкар начишєл и дзепоєдних значнєйши госцованя, як цо то бул наступ на Фестивалє „Лемкивска ватра” у Ждинї, у Польскей; на Фестивалє „Най ше нє забудзе” у Дюрдьове, на „Червеним пупчу” на Фестивалє рускей култури у Руским Керестуре, на Стретнуцу рецитаторох на Костельниковей єшенї у Кули, на Дньох Миколи М. Кочиша у Новим Садзе – шицки спомнути у Сербиї, односно Войводини.
Звит Надпатраюцого одбору поднєсла його предсидателька Мария Филипович, а присутни на Скупштини єдногласно прилапели шицки звити, як и план роботи за чечуци рок. Бешедуюци о тим, Желько Лїкар визначел же ше планує предлужиц з поряднима активносцами и госцованями дзе за то будзе нагоди, алє и буц домашнї дружтвом з наших местох, ансамблом з театралнима фалатами, як и орґанизовац ювилейну, 30. Културну манифестацию „Миклошевци 2015”.
Як и дотераз, средства за роботу Дружтво достанє од Совиту за национални меншини Републики Горватскей, Општини Томповци и Вуковарско-сримскей Жупаниї.
Попри членох Дружтва, на рочней Скупштини присуствовали доначалнїк Општини Томповци Здравко Звонарич, предсидатель Месного одбору Дюра Бики, предсидатель Општинскей ради рускей националней меншини Мирослав Лїкар и член Совиту за национални меншини Републики Горватскей Звонко Костелник, котри присутних поинформовал о нових предписаньох хтори ступели на моц 1. януара 2015. року, а по 1. октобер би мали постац состойна часц и Статуту Дружтва у Миклошевцох.