ДЮРДЬОВ – Всоботу, 17. януара, у Дюрдьове осмираз за шором преславене Националне швето Руснацох у Сербиї, а преслава традицийно почала з кладзеньом заставох – державней, войводянскей и Руснацох у Сербиї на – Руску школу, на будинок Месней заєднїци и на будинок КУД. Програму з нагоди швета орґанизовали Подручна канцелария Националного совиту (НС) Руснацох у Дюрдьове и КУД „Тарас Шевченко”.
У просторийох КУД на 12 годзин отримана шветочна програма, на хторей, после гимни Сербиї и шветочней шпиванки Руснацох у Сербиї, присутних привитал и програму водзел член НС Руснацох Мирон Сабадош, а швето Дюрдьовчаном повинчовали и предсидатель Општини Жабель Чедомир Божич и предсидатель Вивершного одбору НС Желько Ковач.
Божич наглашел же Општина и надалєй будзе помагац орґанизациї и змоцньованє идентитету Руснацох, а преношаци винчованки у мено НС, Ковач гварел же ше Совит у тим мандату будзе намагац буц шицким на розполаганю и помоци.
У мизичней часци на програми участвовали Вельки тамбурови оркестер, помоцнєти з двома гармониками, писателє з Дюрдьова Владимир Кочиш и Яким Чапко пречитали свойо твори, а Тарас Чапко пречитал текст о доселєню Руснацох, нашей историї и тарашнїм стану у Сербиї.
Попри спомнутих, на означованю Националного швета Руснацох у Дюрдьове присуствовали дюрдьовски грекокатолїцки парох о. Яким Холошняй, покраїнски послнїк Тихомир Нежич, представителє Месней заєднїци Дюрдьов, на чолє з предсидательку Совиту Леону Виславски, предсидатель Церковного одбору нашей церкви Янко Салаґ и члени Одбору, представителє Основней школи и гражданє Дюрдьова.
По програми за шицких присутних орґанизовани коктел з рускима традицийнима єдлами.
