ШИД – З нагоди вчерайшого Медзинародного дня людских правох, у Општинским одборе Лиґи социялдемократох Войводини Шид (ОО ЛСВ) вчера отримана конференция за новинарох на хторей бешедовала подпредсидателька ОО и предсидателька Форуму женох тей странки Марка Латас.
Вона визначела же ше на уровню Сербиї людски права ище нє почитує по медзинародних стандардох, а тото твердзенє подкрипела з тим же гражданє защиту своїх правох глєдаю у Европским судзе за людски права у Стразбуру.
Латасова гварела же и у шидскей општини треба вецей робиц на почитованю людских правох, цо першенствено задаток власци, а у тим потребна и инициятива нєвладового сектору.
Як добри приклад почитованя людских правох наведла заступеносц женох у политики на шицких уровньох.