ШИД – У Шидзе вчера отримана схадзка Општинского совиту за управянє з миґрациями, на хторей анализовани стан безпечносци после приходу ґрупи од коло 130 миґрантох з Беоґраду, котри мали намиру прейсц гранїцу з Републику Горватску, алє су застановени. Констатоване же безпечносни стан нє загрожени.
По словох предсидателя Совиту Ивици Йовича (на фотоґрафиї), компетентним будзе предложене зменшованє числа миґрантох, котрих у шидскей општини у трох прилапююцих центрох єст блїзко 2 000, цо препоручене и зоз Заводу за явне здравє зоз Сримскей Митровици, пре удатнєйши мири охрани, насампредз од зявеня ушох по целу.
Йович додал и же Општинска рада вчера прилапела и нови Локални акцийни план за унапредзованє положеняа миґрантох од 2016. по 2020. рок, пре виражени потреби и можлївосци за конкурованє за средства од донаторох цо, як гварел Йович, нє значи же миґранти на подручу шидскей општини останю по 2020. рок.
Секретарка Червеного крижу Душица Полетан гварела же ше тота гуманитарна орґанизация и надалєй будзе старац о розподзельованю поживи, шматох и гиґиєнских средствох миґрантом – по 31. децембер того року у дотерашнїм обсягу, а после того найвироятнєйше у меншим, бо у єдним прилапююцим центре плановане отвориц кухню за костиранє миґрантох.