РУСКИ КЕРЕСТУР – За мешац днї тирваня акциї Месней заєднїци Руски Керестур и Парохийного Каритасу назберани вєдно коло 56 000 динари за помоц Дюрови и Весни Папуґовим, чий квартель з часци згорел самим концом авґуста.
Як внєдзелю оглашене на службох Божих, у тей акциї парохиянє за своїх согражданох назберали 27 850 динари, а шкатули за добродзечни прилоги вчера отворени и у Месней заєднїци (МЗ).
У присустве власнїка квартелю, предсидатель Совиту МЗ Владимир Олеяр и секретар МЗ Михайло Сабадош отворели шкатули хтори були поставени у просторийох Месней заєднїци, у ЯКП „Руском”, та у предавальньох „Тренд би” и „Фреш маркет”, и констатовали же назберани коло 28 000 динари. Пенєж уплацени на жиро-рахунок Весни Папуґовей.
Окрем спомнутей, значна пенєжна помоц уплацена и директно на жиро-рахунок очкодованих, цо углавним донациї привреднїкох з Руского Керестура.
Папуґово уж биваю у своїм квартелю и тераз докончую санированє, а Дюра Папуґа вчера явно подзековал шицким котри дали добродзечни прилоги и помогли им у тим нєщесцу.
