СЕРБИЯ – З догварку Министерства правди и адвокатох, з хтору закончени їх штрайк, задлуженя новтарушох огранїчени, алє цени хтори гражданє плаца за їх услуги ище вше драги, пише Данас.
Медзитим, Министерство правди сообщело же у наступним периодзе годно присц до пременкох у ценох, понеже адвокатом врацени овласценя же би составяли контракти, та новтаруше буду наплацовац лєм оверйованє.
Надополнєня новтарушох ше рахує по бодох, а єден бод 150 динари, без ПДВ. Правни роботи чия вредносц нє векша од 600 000 динари ше наплацовало 60 боди, односно 9 000 динари. Кед ше вредносц правних роботох звекшує, звекшує ше и число бодох, односно пенєжу хтори вони наплацовали, до максималних 4 000 бодох.
Тоти цени ше одноша на надополнєнє хторе новтаруше наплацую за составянє записох. Медзитим, понеже по нових предписаньох велї контракти новтаруше буду лєм оверйовац, вони буду наплацовац 60 одсто полней цени.