ВЕРБАС – Винчуюци швето, предсидатель Националного совиту Руснацох Славко Рац на Академиї у Вербаше наглашел же здобуте мушиме и чувац, же бизме о нїм нє думали аж кед го страциме.
– Ми нєшка можеме буц пишни як през ґенерациї Руснаци уткали свою нїтку до живота на тих просторох. Бо, здобули права и шлєбоди хтори ми маме обовязку чувац – гварел Славко Рац и поручел же у себе треба найсц моци остац над каждодньовима животнима почежкосцами. Тиж поволал Рускинї и Руснацох най уписую дзеци до руских школох, бешедую по руски, читаю руски виданя и тото цо нєшка маме – чуваю за будуци поколєня.
Апостолски еґзарх за грекокатолїкох у Сербиї владика Георгий Джуджар наглашел же Церква вше була и нєшка є нєзаобиходна часц руского єства, хтора учи любиц свойо и жиц у злагоди з ближнїма, а тиж визначел же здобуте мушиме чувац и розвивац.
– Свидоми зме одвичательносци за нашлїдство хторе зме достали и тоти глїбоки коренї Руснацох на тих просторох маме чувац, пестовац, розвивац и любиц – гварел кир Георгий, надпоминаюци же присуство на Централней преслави нашого швета у Вербаше представя и потримовку тому виталному конару руского стебла.