Каритас прешлого мешаца бул уключени до вецей проєктох, у Суботици, Сараєве и Италиї, у хторих участвую и координатор Каритасу нашого Еґзархату Елемир Джуджар зоз Кули и координаторка Каритасу у Новим Садзе Анита Ґовля.
У Городскей хижи у Суботици початком септембра отримани Округли стол „Зменшованє ризику од елементарних нєпогодох”. Каритас Апостолского еґзархату за грекокатолїкох у Сербиї у сотруднїцтве зоз Каритасом Сербиї реализує тот проєкт цали рок. Плановани пейц округли столи у пейцох општинох у Войводини.
Як гварел Елемир Джуджар, у Суботици на Округлим столє були, попри представнїкох Општини задлужених за елементарни нєпогоди, и огньогасци и представнїки рижних орґанизацийох и здруженьох хтори робя на подобних проєктох.
Зоз подобну орґанизацию як у Суботици, у сотруднїцтве з општинами, були округли столи у Вербаше, Новим Садзе и Шидзе, а до конца рока у планє и сходи у Оштини Жабель, шицко на тему зменшаня ризика од елементарних нєпогодох.
Координатор того проєкта на уровню Каритасу Еґзархату то Елемир Джуджар, сотруднїк Анита Ґовля, а фахови сотруднїк Йована Лончаревич зоз Беоґраду.
РЕҐИОНАЛНА РОБОТНЯ У САРАЄВЕ
Концом септембра у Сараєве отримана реґионална роботня на тему „Зменшованє ризику од елементарних нєпогодох” у рамикох проєкта хтори реализую Каритас Сербиї и Каритас Босни и Герцеґовини.
На тей роботнї, медзи пейц особами зоз Каритасу Сербиї були и грекокатолїки Анита Ґовля и Елемир Джуджар, хтори того року и реализую таки проєкт у Каритасу Еґзархата и Каритасу Нового Саду.
На тих роботньох ше вичерало искуства двох жемох, хтори маю подобни проблеми з елементарнима нєпогодами. Бешедоване о тим же як ше треба справовац у нєпогодох и хто за цо задлужени.
Заключене же треба баржей уплївовац на локални власци же би ше баржей анґажовали у виробку планох и процедурох у случайох елементарних нєпогодох.
Догварене и же нови роботнї буду початком октобра у Рудну при Кралєве, дзе центер за обуку водзацих активистох хтори буду правилно реаґовац и водзиц акцию у случаю нєпогодох. Велька помоц тото же у Кралєве, Чачку и Краґуєвцу уж єст тими хтори оспособени за реаґованє у случаю потреби и вони можу пренєсц и другим свойо искуства. То ше реализує у сотруднїцтве зоз Министерством за нукашнї дїла – Сектором за позарядово ситуациї.
Округли стол у Шидзе
СТУДИЙНА НАЩИВА У ИТАЛИЇ
Медзи активносцами и студийна нащива шицких представнїкох Каритасох у Сербиї владическому Каритасу у Биели при Милану у Италиї, а участвовали представнїки хтори робя зоз миґрантами.
По словох нашого учашнїка Елемира Джуджара, було барз хасновите видзиц искуства других жемох. Понеже ше Сербия находзи на такволаней балканскей рути, и дзепоєдни нашо парохиї на тей драги, треба буц порихтани и за евентуални дальши анґажованя.
– През даскельо днї зме обишли церковни будинки дзе змесцени найзагроженши миґранти (стари, дзеци, хори). Були зме и у кампох у хторих миґранти чекаю одход до цильних жемох, лєбо глєдаю азил у Италиї. То барз важне искуство, бо зме ше першираз стретли нє лєм з вельку габу миґрантох, алє и зоз иншаку културу, виру, язиком – приповеда Елемир.
По його словох, було интересантне и упечатлїве же миґранти, углавним муслиманє, були змесцени у церковних обєктох и християнским амбиєнту. Домашнї ше обавали же як ше вони адаптую, алє после краткого часу видзели же нєт проблеми, же ше присподобели и зожили зоз домашнїма.
ПОРУШОВАНЄ СОЦИЯЛНИХ ПОДПРИЄМСТВОХ
Каритас Нового Саду реализує проєкт у рамикох ЕЛБА проєкту, до хторого уключени шицки балкански жеми, вязани за порушованє социялних подприємствох, як новей форми привредзованя, хтори можу помогнуц людзом хтори чежше находза роботу.
Як гварела Анита Ґовля, Каритас у Новим Садзе ма проєкт СОФИА, дзе ше главни активносци одноша на роботнї за дзеци од штирох до осем рокох. Роби ше корективниу ґимнастику, рекреацию и Монтесори роботнї. Святочне отверанє було концом септембра у просторийох Монтесори дзецинскей хижи.
– Були дзеци и родичи, вєдно участваали у презентованю тих роботньох. Тоти активносци би з часом требали прероснуц до социялного подприємства, накадзи у Сербиї будзе прилапени нови закон о социялних подприємствох. За тераз тоти роботнї функционую як активносц у рамикох Каритасу – гварела Анита Ґовля.
ВЕЛЬКА ПОТРИМОВКА У ОПШТИНОХ
Бешедуюци о сотруднїцтве Каритаса и општинох на проєкту зменшаня ризика од елементарних нєпогодох, координатор Каритасу Еґзархату Елемир Джуджар гварел:
– Барз зме задовольни зоз потерашнїма активносцами, бо маме вельку потримовку у општинох, хтори заинтересовани за дальше сотруднїцтво на тим полю. На округлих столох зме видзели же можеме зоз заєднїцкима моцами ришовац актуални проблеми на локалу прейґ проєктох.
Сход у Суботици