СРИМСКА МИТРОВИЦА – З початком нового школского рока у парохийним доме нашей грекокатолїцкей церки у Сримскей Митровици предлужени роботнї з дзецми, на хторих ше им преподава виронауку и руски язик з елементами националней култури.
Всоботу, 26. септембра, по роботнї виронауки, на хторей дзеци з парохом о. Владиславом Варґом и наставнїцу Монику Абодї рисовали и мальовали тематски рисунки пред шветом Воздвижениє Чесного Крижа, означени и Европски дзень язикох, так же дзеци бешедовали на язикох котри знаю и рецитовали писнї по руски хтори научели на дотерашнїх роботньох.
Внедзелю дзецински роботи були виложени у церкви и несподзивали старших вирних, цо була и свойофайтова поволанка шицким парохияном же би приводзели дзеци на роботнї.
Роботнї ше порядно отримує соботами на 10 годзин, и тирваю годзину.