КОЦУР – Вчера у Библиотеки у Коцуре отворена вистава ручних роботох и фотоґрафийох терашнього Активу женох КУД „Жатва”, а з нагоди Осмого марца, Дня женох. Вистава источашнє и перша програма з хтору коцурски жени означую 70 роки од снованя Активу, односно повойнового АФЖ.
Виставу отворела предсидателька Активу женох Коцана Колєсар, котра бешедовала и о роботи Активу за тоти седемдзешат рокох, як и о планох означованя рочнїци. Тиж окреме представени виложени роботи – вишивки, народне облєчиво, гейґловани салветки и партки, хтори приказую творчосц шицких нацийох хтори зложно жию у Коцуре.
О Активу женох, медзисобним сотруднїцтве, як и о наиходзацим означованю 70-рочнїци колонизациї у Коцуре бешедовали и Славко Вулин спред КУД „Завичайно врело”, Микола Ґубаш спред КУД „Жатва”, та проф. др Михайло Фейса спред КПД „ДОК”.
За тоту нагоду бул пририхтани и богати етно-стол, а понеже жени направели надосц лакотки, часц єдзеня однєшена особом у Доме за старих у Коцуре.
Вистава будзе отворена по пияток, 4. марец и членїци Активу женох поволую шицких заинтересованих же би ю пришли опатриц.
