КОЦУР – Всоботу, 9. януара, у Коцуре, у Пелетовей сали на беґелю, отримана Рочна и и Виберанкова скупштина Спортского здруженя Спортских бавискох „Яша Баков” (СБ ЯБ). На Скупштини запровадзени нови правила о участвованя на турнирох у рамикох СБ, спрам хторих участвовац годни здруженя, дружтва и клуби котри достаню поволанку, а нє кажде хто придзе на турнир, як цо було дотераз.
Дружтва котри годни участвовац то: Дружтво Руснацох Суботица, КУД „Петро Кузмяк” Нове Орахово, КУД „Др Гавриїл Костельник” Кула, СД „Русин” и Здруженє рибарох/школа з Руского Керестура. Потим то ФК „Искра” и КПД „ДОК” з Коцура, КПД „Карпати” и „Папивинґ” з Вербасу, РКЦ з Нового Саду, КУД „Тарас Шевченко” и ФК „Бачка 1923” з Дюрдьова, КПД „Дюра Киш” зоз Шиду и єдно место Беркасово/Бачинци, КУД „Иван Котляревски” з Бикичу, а два места будзе мац Координация радох Руснацох з Горватскей. Нове правило и же кед на турнире участвує нєпарне число екипох, теди домашнї маю право направиц два екипи.
Дотерашнї подпредсидатель СБ ЯБ Иван Папуґа поднєсол анализу 24. Бавискох и финансийни звит, хтори єдногласно прилапели присутни з правом гласа. Право гласа мали 13 особи – представителє каждого нашого здруженя хторе ше одволовало на Скупштину, а нє були представителє з Кули, Нового Орахова и Нового Саду.
Понеже дотерашньому руководительству вишол мандат, дотерашнї подпредсидатель Иван Папуґа анализовал и предходни штири роки, односно од 21. по 24. СБ.
У виберанковей часци Скупштини вибрани нови Управни (УО) и Надпатраюци одбор (НО). До УО вибрани Иван Папуґа, Владислав Папуґа, Звонимир Ерделї, Звонко Салаґ и Янко Хома, а до НО Здравко Бабич, Кирил Симунович и Владимир Мученски.
Нови УО такой вибрал и нового предсидателя и нового подпредсидателя СБ „Яша Баков”.
Нови предсидатель дотерашнї подпредсидатель Иван Папуґа з Вербасу, а за нового подпредсидателя вибрани Янко Хома з Руского Керестура. За предсидателя Надпатруюцого одбора вибрани Здравко Бабич з Коцура.
На схадзки присуствовал и предсидатель Вивершного одбору НС Желько Ковач.