ДЮРДЬОВ – Фестивал жридлового шпиваня „Най ше нє забудзе” будзе отримани 21. авґуста у Дюрдьове, а и того року заплановани и провадзаци манифестациї. Пред фестивалску часцу, хтора почнє на 20 годзин, у дворе опрез будинку КУД „Тарас Шевченко” на 16 годзин будзе отворена вистава „Стари ремесла”, а на 17 годзин у Рускей школи вистава „Дакеди було”.
У фестивалскей часци тогорочного Фестивалу буду участвовац шпивацки ґрупи з тринац наших местох зоз Сербиї и Горватскей – зоз Суботици, Нового Орахова, Шиду, Кули, Вербасу, Коцура, Нового Саду, Руского Керестура, Бикичу, Дюрдьова, та з Винковцох, Петровцох и Миклошевцох.
По тогорочних пропозицийох шпивацки ґрупи буду наступац з двома шпиванками – єдну муши провадзиц оркестер, а друга треба же би була виведзена а капела (найменєй два строфи без провадзеня), док остаток мож одшпивац по вибору. Наступ и далєй огранїчени на седем минути по ґрупи.
У ревиялей часци наступи Ансамбл „Ластовичка” з Польскей и Шпивацка ґрупа „Дюрдєвак” з Дюрдьова. Домашнї и того року по початок Фестивала нє жадаю одгаднуц хтори предмет подарую учашнїком, алє одгадли же є древени, же го хасновало кажде обисце як часц прибору за отримованє гиґиєни.