СЕРБИЯ – Нєзанятосц младих остатнї роки барз вельки проблем у Сербиї, найбаржей прето же ше школує кадри нєпотребни на тарґовищу роботи. Прето Привредна комора Сербиї (ПКС) порушала инициятиву же би ше уведло дуалне образованє, цо значи же школяр ходзи до школи, а практичну часц учи у одредзеним подприємстве, дзе найчастейше и остава робиц по законченю школованя.
– Подприємства воля уложиц до школяра котрого можу профиловац спрам своїх потребох, як давац роботу нєквалификованим, до чиєй преквалификациї муша уложиц вельо вецей часу и пенєжу – гварела директорка Центру за едукацию ПКС Миряна Ковачевич, а пренєсол Танюґ.
Уж тераз основана роботна ґрупа за уводзенє ремеселского образованя, а по новим моделу у осем штреднїх фаховних школох у Сербиї уведзени три профили: шлосер-заварйовач, електричар и индустрийни механїчар.
Таку файту образованя ше применює у вецей европских жемох. Найуспишнєйше ю витворюю Австрия и Нємецка, та Сербия догварела сотруднїцтво з нємецку орґанизацию ГИЗ, хтора будзе унапрямовац розвой такого моделу образованя.
