СУБОТИЦА – Дружтво Руснацох у Суботици вчера, 27. новембра, у своїх просторийох орґанизовало преподаванє з тему „Музика при Руснацох”, о чим красному числу присутних бешедовала професорка музики Лидия Пашо з Руского Керестура.
Пашова здогадла на сами початки, та розвой музики през вики, як и на значносц наставаня нотох и можлївосци записованя музики, з акцентом на музики хтора уплївовала на Руснацох, а поведзене же одредзени стари нотни записи шпиванкох маю и Руснаци.
Пашова обрацела увагу на дзепоєдни народни и духовни композициї хтори ше шпива и нєшка, як цо то „Многая лїта”, коляди, „Иже херувими”, а бешедовала и о значносци народних и духовних шпиванкох за Руснацох.
Понеже тема наисце обсяжна и интересантна, орґанизаторе наявюю можлївосц отримованя нових преподаваньох о нашей музики.
