КУЛА – У рамикох 57. Републичного фестивалу аматерских театрох Сербиї у Кули, всоботу, 20. юния, у Малей сали Културного центру отримана програма „Панонски канонциєр”, як вечар рецитованя и музики, на хторим участвовали тогорочни найлєпши рецитатор з местох кулскей општини и школяре Школи за основне музичне образованє (ШОМО) з Кули.
На тогорочней Републичней смотри рецитаторох у Валєве кулску општину представяли аж шесцеро рецитаторе у трох возростох – Лїляна Кнежевич, Исидора Нинков, Тара Божович, Владица Кляїч, Мирослав Малацко и Миляна Нинич, а општина ше може похвалїц же вони освоєли и два перши места – Владица Кляїч з Червинки у штреднїм и Миляна Нинич у старшим возросту, док Мирослав Малацко з Руского Керестура у Валєве бул пияти.
Попри спомнутих, на соботовим интересантно обдуманим перформансу, хтори бул и на високим квалитативним уровню, участвовали и тройо школяре кулскей ШОМО – Серґей Ґелебан на гушлї, Милена Никитович на клавиру и Лїляна Кнежевич на гармоники, котри того року на своїх инструментох освоєли високи награди на державних и медзидержавних змаганьох.
На програми рецитовали и доаєне у рецитаторским руху у кулскей општини и ширше – Амалия Ковач з Кули и Михайло Зазуляк з Руского Керестура. Ковачова роки барз успишни фахови руководитель рецитаторох (того року єй два рецитаторки були на Републичним змаганю – Кнежевичова и Нинкова), а дакедишнї фахови руководитель, Зазуляк тераз член фаховей комисиї хтора оценює рецитаторох од месних по Покраїнску смотру.
Дзепоєдних рецитаторох на ґитари провадзел Сашо Палєнкаш з Керестура, програму водзели и обдумали млади фахово руководителє рецитаторох у Кули и Червинки Слободан Ноґавица (того року пририхтал Тару Божович и побиднїцу Миляну Нинич) и Весна Радоєвич, котра пририхтала побиднїцу Владицу Кляїч. Секретар Културно-просвитней заєднїци Сава Прерадович учашнїком з тей нагоди подаровал кнїжки, а селекторка месних смотрох рецитованя у кулскей општини Слободанка Настасич интересантни пригодни дарунки. На програми привитана и фахова руководителька рецитаторох з Керестура Ивана Дудаш, котра пририхтовала Мирослава Малацка.
