Роботи коло орезованя винїцох углавним уж готови, а фрушкогорска часц Сриму позната по винїцох, алє и же людзе у своїх дворох, лєбо заградох маю даскельо чокоти лози. Орезованє лози єдна з перших и важних роботох, та медзи орезовачами лози на шидским подручу, надосц роботи ма Никола Стоєцки зоз Шиду, чий оцец Петро бул квалификовани овоцар.
Никола гварел же звичайно орезованє лози почина на святого Трифуна, 14. фебруара, алє то то тераз уж баржей лєм традиция.
– Хто ма векши поверхносци под винїцу тоту роботу почина и скорей, окреме кед то дошлєбодзує блага жима, як того року, же би ше роботу закончело на час – наглашел Стоєцки. – Кед ше лоза почина „будзиц”, вец рушаю єй соки хтори чуря на местох дзе орезане. Прето роботу треба покончиц скорей. Лозу ше нє орезує єднак, кед у питаню такволани столни сорти, або сорти за вино. З орезованьом ше вплївує на будуци род – чи будзе звекшани чи зменшани.
Зоз скрацованьом ластарох достава ше менши ґиризди по количестве, алє грозно, односно бобки буду квалитетнєйши и обезпечує ше лєпшу ослункованосц ґириздох. Кед ластар ценши, вец орезованє муши буц оштрейше, зоз скрацованьом „коленцох”, же би лоза кондицийно змоцнєла. Кед же би пребарз було роду, вец ше лозу вичерпує, менєй є одпорна и о даскельо роки може достац даяку хороту.
Никола потолковал же ше такволану „чардаклию” орезує на родни „коленца”. Дакеди ше на окремни способ орезовало лозу на колїкох (придкох), же би росла коло колїка. И плантажни винїци ше орезує так же би од прешлорочного орезованя и зохабених „окцох” було роду у чечуцим року, односно при столних сортох ше зохабя длугши ластари.
– Длуго роки сом уж у тей роботи, та ме людзе познаю и волаю же бим им орезал винїцу. Хто ма винїцу зна и кеди треба орезовац, та ме так и волаю.Тиж єст и людзох хтори маю дома даскельо чокоти лози, чи же би им правела хладок, лєбо и за єдзенє, та и вони волаю же би лоза була благочасово порихтана за наступну родну сезону – гварел нам на концу Никола Стоєцки.