Ище три нови кнїжки з нашей видавательней хижи

автор зам
1k Опатрене

НОВИ САД – У виданю НВУ „Руске слово” тих дньох обявени ище три нови наслови – два кнїжки за дзеци – „Гайзибан на шпарґу” Меланиї Римар и „Злагода” Серафини Макаї, як и кнїжка есейох Миколу Шанти „Шантовки”. Обидва дзецински кнїжки илустровала наша млада уметнїца Ґорана Бильня, а дизайн Шантовей кнїжки подписує Мария Ковачевич.

Мелания Римар авторка уж осем кнїжкох за дзеци – писньох, приповедкох и сказкох. У кнїжки „Гайзибан на шпарґу” Римарова у кратких приповедкох за наймладши дзеци дава важносц подїйом хтори дзецом у тим возросту значни за їх формованє – насампредз то розвиванє любови ґу найблїзшим, ґу животиньом и рошлїном.

1-Knjizki-02

Кнїжка кратких приповедкох и писньох за дзеци „Злагода” Серафини Макайовей шеста по шоре. Понеже добре позна психолоґию дзецох школского возросту, прейґ єй найновших приповедкох и писньох дзеци ше науча одвичательносци, любови, праведносци и гуманосци – як спрам своїх найблїзших и товаришох, так и спрам животиньох и природи.

1-Knjizki-03

Микола Шанта у нашей явносци познати насампредз як поета, автор є шейсц кнїжкох поезиї, а остатнї роки ше афирмовал и як прозни и романописатель. З кнїжку „Шантовки” ше публики представя и як есеїста – о русинстве, литератури и о рижних животних зявеньох.

1-Knjizki-04

Шицки три кнїжки мож купиц у просторийох НВУ „Руске слово” у Новим Садзе и Руским Керестуре, як и наручиц прейґ сайту „Руского слова” (єєє.рускеслово.цом – у рубрики „кнїжки”). Обидва нови кнїжки за дзеци коштаю по 300, а „Шантовки” 400 динари.

ПОВЯЗАНИ ТЕКСТИ