РУСКИ КЕРЕСТУР – Наймладши ґлумци Драмского студия „АРТ” Дому култури Руски Керестур вчера на Мемориялє виведли представу „Як настали бридки слова” Душка Радовича, хтору преложел Михайло Бодянец, а режирала Ксения Бодянец.
Вельочислена публика могла провадзиц на сказковити способ представену приповедку о тим як настанє и у яких ситуацийох ше бридке слово преноши з особи на особу, а на сцени ю виприповедали и ґлумци з численого ансамблу – Ребека Семан, Минеа Югас, Микола Еделински, Яна Настасич, Андрей Надь, Алексей Надь, Иван Рац, Павле Венчельовски, Тереза Будински, Марина Надь, та Милица Милинович, Корнелия Будински и Уна Планчак.
Представу помогли витвориц суфлерка Сара Планчак, сценоґрафию пририхтала Александра Медєши, костими Таня Орос, музични сотруднїк и тон-майстор Михайло Бодянец, а майстор шветла Сашо Палєнкаш. Як то уж длугши час, кажди рок од кеди є пензионер, Керестурец Славомир Олеяр и з тей нагоди учашнїком у керестурскей дзецинскей представи подаровал рижни лакотки.
Попри домашнєй, представу у полней сали з публику патрели и коло 45-еро школяре руских оддзелєньох од першей по шесту класу з Дюрдьова, та коло 25-еро школяре хтори виучую руски язик як виборни предмет у Новим Орахове и Бачкей Тополї, зоз своїма наставнїцами. Дзеци з Орахова и Тополї по представи нащивели и Музейну збирку у Замку.
И їх приход на Мемориял финансовал Одбор за образованє Националного совиту Руснацох, як пред тим дзень и приход наших дзецох з Коцура и Вербасу.