НОВИ САД – Дзевец општини у Войводини, медзи хторима и Кула, достали вєдно 30 милиони динари на конкурсу хтори бул розписани за проєкти унапредзованя инфраструктури у општинских индустрийних зонох.
Контракти хасновательом средствох по конкурсу вчера уручел покраїнски секретар за привреду, обезпечованє роботи и ровноправносц полох Мирослав Васин, а пре огранїчени средства, спомедзи 23-ох општинох хтори конкуровали, пенєж достаню лєм дзевец – Бачка Тополя, Мали Идьош, Ириґ, Кула, Бела Црква, Индїя, Беочин, Бачка Паланка и Ада.
Средства наменєни за инфраструктурне опреманє индустрийней зони, як цо то драги, електроинсталациї, односно трафостанїци, нїзко-напонски мрежи, явне ошвиценє, водоводни и канализацийни мрежи и друге.
Прейґ софинансованя вибудови индустрийний зонох, и Покраїнска влада участвує у злєпшованю привредних активносцох, обезпечованю условийох за прицагованє инвеститорох, та з тим и отвераню нових роботних местох у войводянских општинох.