ВУКОВАР/МИКЛОШЕВЦИ – Под час велькей курняви, хтора у Вуковарско-сримскей жупаниї у Горватскей тирвала од соботу вноци по пондзелок рано, у Комуналним подприємстве „Комуналєц” з Вуковару гварели же нє було нїяки проблеми.
Механїзация за чисценє драгох на цалим подручу Жупаниї була на час порихтана, як и вельке количество солї, а драги чисцели од нєдзелї рана, по ютредзень, пондзелок рано. Без огляду же дул моцни сиверни и сиверо-восточни витор, анї на найкритичнєйших местох на драгох нє було нанєшеного шнїгу.
У Миклошевцох и Петровцох драги були добре очисцени, та ше транспорт, як и вшадзи на тим подручу, одвивал нормално.
Почежкосци у велїх валалох, та и у Миклошевцох и у Петровцох, єст єдино опрез хижох у хторих нїхто нє бива, бо нєт хто одруцац шнїг, хторого местами було и вецей як 25 центиметри.