Каждому чловекови потребна мац

автор маф
1k Опатрене

Найвекше Марийово швето – Успениє Пресвятей Богородици – Вельку Матку Божу, вирни парохиї св. оца Миколая у Руским Керестуре, хтора ше ровна по григориянским календаре, преславели 15. авґуста. Найвецей вирних було на Служби Божей на 10 годзин, хтора була у Марийовим святилїщу Водици, дзе було окреме вельо присутних Керестурцох, а тиж и таких хтори ше през лєто врацаю до свойого родного валалу, а жию у других державох.
Службу на олтаре у лєтней каплїци служел домашнї парох о. Михайло Малацко, а капеланє о. Владимир Медєши и о. Михайло Шанта споведали. Барз вельо присутних вихасновали и нагоду за тоту св. Тайну, а вона єдно з условийох достац подполни одпуст, хтори однєдавна мож прияц и у нашей Водици.
Водица и Мария як правдива Мац, прицагує свойо дзеци од вшадзи, и велї шведоча о окремней духовней атмосфери у тим нашим святилїщу, дзе шерцо вше ознова цага, поготов тих цо пошли жиц далєко. Праве тоти мацерински Марийово прикмети парох о. Малацко и визначел у своєй казанї.
Пре свою нєпорочносц и мацеринство Сина Божого, як потолковал о. Малацко, Мария була вжата на нєбо зоз преславеним целом хторе нє остало у гробе чекац обще воскресенє.
– У очох Божих преславенє ше случує по иншаких правилох як при нас, людзох. Найвекши тот хто найвецей люби, а така була и Мария. З нєшкайшим шветом Бог прето преславел и жену, бо як цо по Еви диявол
вошол до чловеческого роду, так є по Мариї знїщени. Зоз Успеньом Бог возвишел и мацеринство. Же би указал цо то любов, вон вибрал Мацер. Дал ю цалому чловеческому роду, док стала под Исусовим крижом. Теди зме достали мацер хтора нє лєм наша заступнїца, алє и тота хтора нам остава у нашим куцику, у нашей глїбини, бо хто може забуц любов мацери? Нєшкайше швето то борба за тот куцик у нас, а зачуваме го зоз достойним животом по вири у нашим каждодньовим живоце – заключел о. Малацко.
Служба Божа закончена зоз Молебеном до Богородици хтори служени у одходу ґу Водицовей пещери.

ПОВЯЗАНИ ТЕКСТИ