РУСКИ КЕРЕСТУР – У просторийох Каритасу у Руским Керестуре прешлей соботи отримана перша, психолоґийна часц обуки волонтерох котри буду робиц у будуцим Каритасовим Телефонским центре за слуханє „Нїтка”.
Обуку тримал тренер др Йовица Лукич з Беоґраду, а у нєй активно участвовали коло 20 волонтере з вецей местох – Керестура, Коцура, Нового Саду, Кули, Бечею и з Бачкого Бреґу.
На обуки участвовал и вивершни директор Каритасу нашого Апостолского еґзархату Янко Катона и координаторка нового Центру Соня Виславски, обидвойо з Керестура.
За волонтерох предвидзена и друга часц – духовна обука – хтора у керестурским Каритасу будзе отримана 24. октобра, а викладац буду о. Владислав Варґа зоз Сримскей Митровици и о. Ласло Поша з Бечею.
Волонтере котри законча цалу обуку достаню сертификат, хтори годни похасновац и у своєй роботней биоґрафиї. З тим буду оспособени за уключованє до роботи будуцого Телефонского центру за слуханє, хтори будзе мац телефонски линиї там одкаль волонтере.
Центер за слуханє би мал почац концом новембра, а зоз заґарантовану анонимносцу, до ньго ше годни явиц людзе котрим потребна помоц – як з нашого Еґзархату, так и ширше, и то по руски, сербски и по мадярски.