РУСКИ КЕРЕСТУР – У рускокерестурскей парохиї св. оца Миколя вчера шветочно преславена Вилїя, а нєшка Рождество Христово-Крачун, хтори ше будзе преславйовац по 27. децембер.
На Вилїю ше колядовало по цалим валалє, а на 23 годзин окреме шветочнє було на крачунским Всеночним богослуженю у катедрали св. Миколая, хторе предводзел наш владика Георгий. Зоз владиком сослужели домашнї парох о. Владислав Варґа, о. Дарко Рац парох з Бачинцох, о. Владимир Ковтик з Ужгороду, о. Владимир Миколка парох з Беркасова и домашнї капеланє о. Владимир Медєши и о. Михайло Шанта.
Нєшка, на перши дзень Крачуна, богослуженя буду на 8 годзин, на 10 архиєрейска Литурґия хтору тиж будзе предводзиц владика Георгий Джуджар, и вечарша Служба Божа на 17 годзин.
На Всеночним, наступел и госцуюци хор Шицких святих зоз Ужгороду хтори шпивал вєдно з домашнїм Катедралним камерним хором. А так исто будзе и на перши дзень Крачуна, шпивац на архиєрейскей Служби на 10 годзин.
На нєдзелю, на други дзень швета, преславює ше Собор Богородици и св. Осифа Обручнїка. Богослуженя буду на 9, дзецинска на 11,30 и вечарша Литурґия на 17 годзин.
На треци дзень Крачуна, пондзелок 27. децембра, Церква ше здогадує першого мученїка Штефана, Служби Божо буду на 8, на 10 и на 17 годзин. На шицких Службох того дня будзе и мированє.
