Прешлого викенду, 6. и 7. авґуста, у рамикох ювилейних 25. Спортских бавискох „Яша Баков” на стадиону ФК „Бачка 1923” у Дюрдьове отримане змаганє у вельким фодбалу за сениорох, на хторим участвовали штири екипи з наших местох, а найлєпши бул рускокерестурски Русин котри всоботу и внєдзелю победзел на пенали. Змаганє судзели реґистровани судийове з Дюрдьова Понеже всоботу падал диждж, змаганє отримане на мокрим терену.
– За фодбал нє потребни окремни условия на терену, трава може буц мокра, може и води буц на нєй. Змаганю може завадзац єдино моцнєйша молга, або моцни витор пре котру нє мож контроловац рушанє лабди – гварел Янко Хома член Управного одбору СБ и фодбалски судия. Всоботу, у першим полуфиналним змаганю Русин и коцурска Искра бавели нєришено (0:1) 1:1, та о побиднїкови одлучели пенали, у чим Керестурци були лєпши 5:4. У другим полуфиналним змаганю дюрдьовска Бачка 1923 з (2:0) 2:1 победзела Єдинство з Ґосподїнцох. Внєдзелю, у змаганю за треце место, фодбалере Єдинства зоз 4:3 победзели Искру, а финалне змаганє Русину и Бачкей 1923 победзели Керестурци на пеналох. У першим полчасу Бачка бавела динамичнєйше и мала векшу инициятиву, алє тоту улогу у другей часци змаганя превжал Русин медзитим у реґуларним чаше закончене без ґолох и побиднїка – 0:0. После лєпшого видзеня пеналох, Русин з Керестура з 5:3 победзел Бачку и так освоєл перше место, на турнире. Друге место завжала домашня Бачка 1923, треце Искра з Коцура, а штварте Єдинство з Ґосподїнцох.
– Видно же тоти штири екипи добре и квалитетно бавя, та и змаганє було добре. Верим же у наступней сезони буду мац замерковани резултати – гварел Янко Хома.
На нєдзелю, 14. авґуста, у рамикох СБ „Яша Баков” на Паличу будзе турнир у одбойки на писку, перши викенду септембру будзе мали фодбал „три на три” у Руским Керестуре, а 10. септембра мали фодбал за ветеранох у Коцуре.
РУСИНОВЦОМ ПЕРШЕНСТВО ПОЧИНА 21. АВҐУСТА
Прешлого викенду на турнире „Яша Баков” у Дюрдьове Русин завжал перше место. Тренер Златко Саянкович з тей нагоди виявел:
– Русин помали уходзи до закончуюцей фази пред першенство котре преложене за 21. авґуст. Тераз ше вецей будзе робиц з лабду. Пририхтованя одробени досц добре, 4. раз до тижня ше тренирало, а за викенд ше бавели контролни змаганя. На розполаганю єст 20 бавячох, у новей лиґи першенство будзе вельо моцнєйше як прешлого року и я думам же ше Русин будзе успишнєйше змагац у Подручней фодбалскей лиґи Зомбор – Бачка Паланка – потолковал требер Русина.
У остатнїм контролним змаганю, пред початком першенства, Русин на нєдзелю будзе бавиц у Кули процив ФК „Кула”.
