РУСКИ КЕРЕСТУР – Зоз Службу Божу на 17. годзин у Малих шестрох Исусових на Циґлашоре, вирни, почитователє и приятелє означели швето Рождество Богородици – Кирбай у Малих шестрох.
Службу служел керестурски парох о. Владислав Варґа и у своєй надихнутей казанї о живоце малих шестрох у Керестуре визначел же вони нашлїдзую Марийов живот зоз дїлом. На концу своєй казанї отец Варґа потолковал же и шестра мати Терезия визначовала же Исусови потребни мали дїла, алє зробени з любови.
После служби шицки вирни ше подружели, як то уж и звичай у Малих шестрох, подзелєли свойо упечатки у друженю зоз шестру Мартину, шестрами Служебнїцами, парохом, панїматку и другима котри присуствовали служби.
