НОВИ САД – Покраїнски секретарият за здравство, социялну политику и демоґрафию тих дньох обявел вецей явни поволанки и конкурси за 2016. рок, а медзи нїма и за софинансованє трошкох за биомедицински допомогнуте оплодзенє за друге, треце и кажде шлїдуюце дзецко, хтори отворени цали рок. Цали рок тирва и явна поволанка за пенєжну помоц фамелийом у котрих ше народзело треце дзецко, у виносу од 12 000 динари.
Розписани и конкурс за софинансованє програмох здруженьох гражданох з обласци социялней защити и защити особох з инвалидитетом, борецко-инвалидскей защити, дружтвеного стараня о дзецох и популаризованя пронаталней политики. За тот конкурс Секретарият опредзелєл 8 милиони динари.
За софинансованє и финансованє мирох, активносцох и програмох у обласци социялней защити у тим року по конкурсу опредзелєни 30 милиони динари, а конкуровац можу установи социялней защити з Войводини и здруженя гражданох хтори давателє услугох социялней защити.
Вецей информациї о конкурсох мож видзиц на сайту Секретарияту – www.zdravstvo.vojvodina.gov.rs