РУСКИ КЕРЕСТУР – На дньовим шоре соботовей схадзки Националного совиту (НС) констатоване задзекованє члена Совиту Миколи Медєша з Коцура, з лїстини „Млади за будучносц“. Медєши задзекованє дал „пре приватни причини”, тай же, после потребних процедурох, на його место придзе друга особа зоз спомнутей лїстини.
НС всоботу нє меновал трецого члена Управного одбору (УО) Новинско-видавательней установи (НВУ) „Руске слово” зоз шора занятих и менованє будзе после повтореного предкладаня члена.
Совит од НВУ „Руске слово” вимага повторне предкладанє члена прето же, як поведзене на схадзки, при виборе кандидата пришло до процедуралних гришкох, понеже гласане двараз – на першим сходзе занятих перше найвецей гласи достал Микола М. Цап, а пре констатацию же нє гласали шицки заняти, гласанє було понїщене, та на другим гласаню прешлого тижня найвецей гласи достала Ясна Ковач, шеф рахунководства у НВУ, котра на схадзки НС була предложена за менованє до УО. Попри процедуралней гришки у гласаню, спорне и чи пре функцию шефа рахунководства Ковачова може буц член УО у истей установи, цо будзе преверене у компетентних институцийох – гварене на схадзки.
Понеже Управному одбору Дому култури Руски Керестур (ДК), хтори преглашени за установу од окремного значеня за Руснацох та єдного члена дава НС – виходзи мандат, на предкладанє свойого Одбору за културу НС за члена УО предложи Михайла Зазуляка з Руского Керестура.
Першобутно за члена УО ДК бул предложени Желько Ковач, медзитим, понеже є одборнїк у Скупштини Општини Кула, пре зраженє интересох нє шме буц член УО ДК Руски Керестур. Членох УО менує Скупштина општини Кула.
Бешедуюци о предкладаню членох до управних одборох, на схадзки зауважене же НС нє провадзи кеди у иниституцийох и установох дзе и Совит предклада членох виходза мандати, та ше таки ствари кончи у остатнєй хвильки. Заключене же ше вироби календар провадзеня тирваня мандатох у таких УО.
На соботовей схадзки НС дал позитивне думанє о Правилнїку о систематизациї роботних местох у Заводзе за културу войводянских Руснацох, понеже ше го муши ускладзиц з новим Законом о роботи. Думанє дате зоз заувагу же треба конкретно и детально навесц потребни условия за окончованє функцийох и роботох у Заводзе, а Правилнїк будзе прешлїдзени до Покраїнскей влади на прилапйованє.