НОВИ САД – Вчера у просторийох Заводу за културу войводянских Руснацох отримана конститутивна схадзка Вивершного одбору (ВО) Националного совиту (НС) Руснацох, хтори вибрани на схадзки Совиту 6. децембра прешлого року.
На вчерайшей схадзки присуствовали шицки члени – предсидатель ВО Желько Ковач, та Йовґен Мудри, Наташа Макаї Мудрох, Наташа Регак и Микола Шанта, котри прилапели и Дїловнїк о роботи ВО. На схадзки Одбору присуствовали и предсидатель и секретар НС Руснацох Славко Рац и Таня Арва Планчак.
Медзи иншим, ВО заключел же би по 20. фебруар мали буц отримани конститутивни схадзки шицких одборох и роботних целох НС вибраних на схадзки Совиту 6. децембра 2014. року. Попри тим, предложене же би одбори и роботни цела принєсли и свойо плани роботи и можлїви финансийни плани.
Члени ВО вчера предложели єдного члена Одбору за службене хаснованє язика и писма, як и члена Роботного цела за управу и предписаня, координаторох подручних канцеларийох по местох, дзе бешедоване и о одредзеней будуцей роботи канцеларийох. У началє прилапени Предлог Календару найзначнєйших манифестацийох, як и предкладанє о местох отримованя Централней преслави Националного швета Руснацох за наступни три роки. О шицких предкладаньох ВО будзе одлучовац НС на своєй шлїдуюцей схадзки.
НС ма дац согласносц и на План и програму роботи и Финансийни план за 2015. рок Заводу за културу войводянских Руснацох, хтори вчера ВО прилапел, а членом го потолковал директор Заводу мр Серґей Тамаш. После даваня согласносци на НС, спомнути документи буду дати на розпатранє и прилапйованє другому сосновательови – Покраїнскей влади.