НОВИ САД – У Заводзе за културу войводянских Руснацох вчера отримана конститутивна схадзка нового Одбору за информованє Националного совиту (НС) Руснацох. На схадзки присуствовали 5 зоз седем членох Одбору, хторому и у тим зволаню на чолє новинар „Руского слова” Иван Сабадош.
После прилапйованя Дїловнїку о роботи, спрам хторого Одбор ма право давац и думанє о кандидатох за одвичательних редакторох у наших медийох, та предкладац други одлуки вязани за информованє на руским язику, у Планє роботи Одбору за тот рок на першим месце и надалєй софинансованє дньовей информативней аґенциї „Рутенпрес”, алє и софинансованє и помагнє у едукацийох за новинарох.
Тиж так, Одбор за информованє будзе запровадзовац и афирмативни акциї вязани за нашу заєднїцу, як цо то промоциї упису до школох, а у планє и финансийно потримац шицки руски медиї, як и помогнуц медийом хтори у поступку приватизациї, у институцийним смислу.
Як поведзене на схадзки, вкупни буджет Одбору у тим року 400 000 динари, з чого 300 000 унапрямени за софинансованє „Рутенпресу”, за проєкти и едукациї одредзени 80 000, а за потримовку медийом 20 000 динари.
На схадзки членїца Одбору Еуфемия Ґшвенґ поинформовала членох о цеку приватизованя Инофрмативного центру „Вербас”, чию дїялносц локална самоуправа будзе финансовац по конєц юния. Одбор предложел же би ше пошвидко направело контакти зоз шицкима локалнима самоуправами дзе єст информованє по руски, пре активне уключованє до цеку приватизациї.
На схадзки бешедоване и о поволанки на сотруднїцтво у креированю додатку „Меншини” у дньових новинох „Данас”, о вимогох Новинарскей асоцияциї Руснацох (НАР) о двох едукативних проєктох, та о потримовки проєкту за виробок веб-порталу за представянє шицки меншинох на сербским язику.
На схадзки Одбору за информованє присуствовали и предсидатель Вивершного одбору НС Желько Ковач и секретар НС Таня Арва Планчак
