КУЛА – Прешлого тижня, штварток, 22. септембра, у Кули отримана конститутивна схадзка Совиту за родну ровноправносц и витворйованє єднаких можлївосцох Општини Кула, а як гварела його предсидателька Миляна Дякович, тото роботне цело ше будзе закладац за злєпшованє положеня женох у кулскей општини, будзе провадзиц витворйованє ровноправносци полох и политики єднаких можлївосцох и афирмовац творчосц женох у шицких местох општини Кула.
На конститутивней схадзки Совиту визначене же потребна ревизия терашнього Локалного акцийного плану за родну ровноправносц, хтори на моци до конца рока, а порадзене и о дальших активносцох, з наглашеньом на лєпше сотруднїцтво з установами и институциями у кулскей општини, насампредз пре злєпшованє родней ровноправносци.