Коцурски Майк, шампион Сербиї

автор Т. ХОДАК
1.4k Опатрене

Любов чловека ґу псови стара кельо история постояня чловека. Тота повязаносц хтора тирва през милениюми преросла до своєродней любови хтора корунована зоз окремним науковим конаром – кинолоґию. Слово кинолоґия старогреческого походзеня и у прекладзе означує науку о псох. Но, на першим месце, могло би повесц же слово о фаталней любови хтору мож третировац и як спорт.

Кед лєпше роздумам, вше сом барз любел пси. После осемнастого родзеного дня шицки пайтше куповали мобилни телефони, компютери, лєбо подобне. Мнє то нє було цикаве. Я жадал купиц велького пса, и наисце так и було. Майк, наш булмастиф до нас сцигол за осми марец. Шалєли зме ше же то мацери за дзень женох, а на концу зме го шицки дома барз полюбели. Потим сом надумал же го одведзем на виставу…

Так почина свою приповедку Алексей Будински, студент зоз Коцура. Нєшка Майк ма штири роки, и осемдзешат кили, и на змаганьох у красоти освоєл вельки припознаня и титули младого, як и дозретого шампиона Сербиї. Кед Алексей купел Майка, вон мал лєм три мешаци, а уж му ноги вишели аж по жем кед ше го тримало на рукох. А прецо праве булмастиф –  за тим ше скрива цикава приповедка.

– Пачела ми ше така раса псох ищe одскорей. Патрел сом филм „Роки”, и пачело ми ше же Роки боксовал. Роки у тим филму мал пса хтори ше волал Буткуш и вон бул булмастиф. Прето и я пожадал такого истого пса – гвари Алексей.

Алексей зоз Майком почал ходзиц на вистави такой кед мал штири мешаци. На медзинародну виставу до Оджаку вон, и його пайташ Марко, хтори бул „гендлер” односно водзел Майкия, пошли праве же би видзeли як ше укаже. Такой на першей вистави, освоєл свою першу награду –  найкрасшого пса на вистави. Теди почали їх авантури.

 ЯК ПОРИХТАЦ ПСА ЗА ВИСТАВУ?

На виставох псох єст два основни катеґориї. У єдней ше оценуює лєм красота, а у другей пси прескакую препреченя и преходза през рижни полиґони. Алексейов Майк ше змагал у першей катеґориї, алє и за таку оцену було потребне вельо тренинґи.

– Же би пес бул успишни на виставох, муши вельо вежбац. Мой пайташ Марко теди уж мал досц искуства зоз виставами понеже ходзел зоз своїма псами, та прето сом зоз нїм тото шицко розпочал. З Майком зме ходзели тренирац на стадион. Ту зме вежбали шицко цо було потребне випочитовац на вистави. Бегали зме до кругу, учели зме го же би знал стануц до преписаного положеня, и най ше нє бої указац судийом зуби, на цо досц чежко пса звикнуц – бешедує Марко.

Спомнута Майкова перша вистава була кед бул ещи щенє, и ту нє було даяки вельки критериюми. Перше ше змагал у ґрупи медзи свою расу, вец у ґрупи медзи подобнима расами, и потим за найлєпшого пса на вистави, то ше вола БИС, лєбо „бест ин шоу”. Вистави, як Алексей толкує, єст од фебруара по новембер каждого викенду, а змагатель може вибрац же на хтору пойдзе, лєм ше муши напредок приявиц и плациц котизацию.

– Як награду, Майк на виставох доставал погари и припознаня. Кед освоєл и БИС, вец достал и мех покарми за пси. Праве зоз тим сом го вше и кармел. Нє могло го кармиц з остатками од полудзенку лєбо гоч з чим,  бо  му то мало, а з другого боку у ґранулох вше ма шицко потребне – гвари Алексей.

Тиж так, дзекуюци виставoм Майкови росла и репутация и угляд. Кед вецей ма титули, вец вецей мож глєдац пенєжи при парованю того пса зоз даяким другим, а и вон сам барз вельо кошта. Медзитим, после даякого часу, Майкови вистави престали буц цикави.

Aleksej

ДОСЦ МИ, ВОДЗЦЕ МЕ ДОМУ

Майк наисце бул красни пес, и заслужено освойовал шицки тоти погари хтори  и нєшка украшую Алексейово обисце. Медзитим, йому то нїґда нє було интересантне. Часто знал буц нєзаинтересовани, и, як би млади поведли „сморени” на виставох, цо иритировало судийох.

З єдней нагоди, Алексея колеґа посовитовал же би зоз Майком нащивел шветову виставу у Будaпешту. Дакус роздумовал, а вец Алексей, Марко, Алексейов оцец и Майк ше позберали на драгу до Будaпешту. Праве пре Майково справованє на драгу рушели дзень скорей, же би ше пес могол наспац пред виставу.

– Були зме у єдним готелу дзе нам допущели же би пес бул з нами у хижи. Того дня ми троме обишли дакус Будaпешт, а Майк остал спац у хижи. Преспали зме шлїдуюцу ноц, и ютре рано була вистава. Конкуренция у раси булмастифох була досц велька, було двацец шейсц пси, цо поровнуюци зоз пейцома-шейсцома, кельо их єст на виставох у Сербиї, барз моцнa. Велька чесц була вообще зявиц ше на такей вистави – толкує Алексей и предлужує – Майк бул цали час барз нєзаинтересовани и випатрало як кед би сцел повесц же „досц ми, водзце ме дому”. Но, упрекосц тому, бул найлєпши у своєй раси, потим у ґрупи подобних расох, и сцигол аж по топ пейсц найкрасши пси на швеце. Медзитим, гоч ше судийки барз пачел, превагло його розположенє и закончел пияти на шветовей вистави. Гоч як обрацим, я цалком задовольни зоз тоту награду.

Праве прето же го то вецей нє интересовало, Алексей з Майком вецей нє ходзи на вистави. Тераз Майк ужива у вилєгованю по куцикох Бидинскового обисца.

МИМИ

Влонї, Алексей купел нового любимца, и дал єй мено Мими. Мими раси французки булдоґ, и цалком є иншака од Майка. Окрем того же є мала, вона стално радосна и розбавена. Мими тиж почала шоровац успихи на виставох.

– Мими ше з початку тиж добре указала,  и вона освоєла БИС на єй першей вистави, державней, у Кули. Барз добре же вона одросла з Майком, та є звикнута на вельки пси и нє бої ше од нїх. На виставох єст пси хтори би ю буквално могли розтаргац, а вона ше заш лєм, шейта, полна себе нє обрацаюци увагу на нїх, и обачел сом же ше то судийом барз пачи, а и єй –  видно же наисце ужива у виставох – толкує Алексей.

Пре хороту, Мими єден час нє ходзела на вистави, и нє поспишело ше єй ище указац ше цалком. Алє єст часу, можебуц и вона познєйше будзе пес шампионскей краси. Дотля є Алексейовей фамелиї уж найкрасша, бо ю швидко, як и Майка, барз полюбели.

 НЇЖНИ ДЖИН

Кед видза Майка, велї людзе ше боя, бо є барз вельки. Медзитим, Алексей ше шме ставиц же би вон нїґда нїкого нє покусал.

– То и преверене з нашим домашнїм псом Бобийом. Раз мац чула галайк вонка, и кед вишла, Майк лєжал на Бобийови з прекриженима ногами, а крев му капкала з устох. Думала же Бобия найдзе покалїченого, алє кед их розрепела, и кед Боби вишол махаюци з хвосциком, похопела же Боби Майка покусал по ґамбох, а вон ше винервирал, та на ньго лєгнул. Так и з людзми, евентуално би могол дакого звалїц и стац над нїм, покля му ґазда нє пове же би ше склонєл – бешедує Алексей.

ПОВЯЗАНИ ТЕКСТИ