Крадню транспортни знаки

автор зам; фото наше место
1.1k Опатрене

КОЦУР/ЗМАЄВО – Як пише портал „Наше место”, на драги Коцур-Змаєво роботнїки ЯКП „Комуналєц” знова мушели поставяц транспортни знаки, бо дотедишнї покраднути, так же з „Комуналцу” поволую гражданох же би нє крадли вертикалну транспортну сиґнализацию, пре безпечносц у транспорту.

Як гваря у ЯКП, о ризичносци тей драги за безпечносц у транспорту, длугокей 8,5 километри и хтора драгу до Нового Саду скрацує за 20 километри, шведочи и число транспортних знакох, бо були поставени аж 38.

По тей узшей драги Коцур-Змаєво иду превозки и зоз сушедних општинох, єст надосц бициґлистох и польопривредни машини, аж и терховни камиони, гоч є першенствено наменєна за польопривреднїкох, а проблем и же шицки транспортни знаки були покраднути. Пре числени круцини, драга окреме опасна вноци.

Подобна ситуация з крадзу транспортних знакох и на драги Савине Село-Косанчич, та вертикална сиґнализация и там будзе знова положена. Як пише „Наше место”, транспортна полиция змоцнєла патроли и контролу на спомнутих драгох.

ПОВЯЗАНИ ТЕКСТИ