МИКЛОШЕВЦИ – На Вилїю пред Крачуном миклошевски дзеци ходзели по шпиваню по родзинох и сушедстве винчовац Крачун, док леґинє колядовали дзивком. Всеночне у церкви Рождества Пресвятей Богородици почало на 23 годзин, на хторим миклошевски парох и викар сримско-славонски о. Яким Симунович пошвецел хлєб хтори ше будзе дзелїц на Треци дзень Крачуна, кед по обидвох службох Божих (на 10,15 и 17,30 г.) будзе мированє. По Всеночним, уж традицийно опрез церкви бул огньомет.
Рождество Христово у Миклошевцох преславени вчера на двох службох Божих, з госцами и з других крайох Горватскей, як и з Войводини, а на службох о. Яким Симунович пречитал и крачунску винчованку владики крижевского, кир Николи Кекича.
З традицийну винчованку „Христос Раждаєтся – Славите Єго” о. Симунович Миклошевчаном и присутним повинчовал Крачун и у свойо и у мено Церковного одбору, а числени вирни з тей нагоди приступели причащаню. Крачунске дожице возвелїчане и зоз шпиваньом колядох, хторе предвозел дзияк Антонь Лїкаров.
