Креативносц зоз старима цеглами

автор тах
1.4k Опатрене

Стари цегли и черепи хтори велї маю наскладани у заднїм дворе ознова достали свою намену и хаснує ше их за вонкашню декорацию, а Коцурец Милан Дрляча єден з майстрох хтори уж дзевяти рок будує украсни мурики зоз старого будовательного материялу.

– Найчастейше будуєм украсни мурики, алє ту и печеняри, чопи, шанки, шицко тото цо тераз популарне. Я таке перше почал дома робиц, а вец у пайташа, то людзе видзели и волали ме же бим и им направел. Тераз уж єст дас 15 мурики у Коцуре хтори я вимуровал, и можем повесц же вони наисце прикрашую наш валал – гвари Милан.

Пошвидко, за Милана ше пречуло и у околїску, а тераз уж зоз сином Предраґом мурує по цалей Войводини. Роботи ма надосц, та му з рока на рок и поостава, бо нє може постарчиц. Од материялу хаснує стари цегли и черепи хтори до мурикох уклада цали, лєбо их реже на менши фалатки зоз окремну машину хтору тиж сам направел спрам своїх потребох, и хтора му барз олєгчує роботу.

– Черепи єст барз вельо, а цегли уж єст вше менєй. Барз цикаве же ше тоти швабски цегли од места по место розликую. Иншаки су по димензийох, як и по фарби, а маю и иншаки иницияли. У Коцуре ище и найподлєйша цегла, док у Керестуре барз красни и квалитетни стари цегли, лєбо, наприклад, у Србобрану – бешедує Милан хтори идеї за будованє достава у хвильки кед треба муровац, а красни мурики ше вимурую, так повесц, сами од себе. Потераз вимуровал вецей як 50 мурики, а заинтересованим людзом дзечнє указує фотоґрафиї же би ше одлучели яки мурик жадаю у своїм обисцу.

DSC_0135

ДАЮ МУ РОБИЦ ПО СВОЇМ

– Велї ми препуща же бим сам одлучел як направим мурик, бо вше випаднє крашнє. А я анї сам нє знам як випаднє на концу, як вежнєм цеглу до руки, так ю положим. Вше меркуєм же би було крашнє поробене, же би фуґни були истей ширини, и бул даяки склад. Як роки преходза, видзи ше ми же ми идзе вше швидше, а кажди мурик красши як гевтот пред тим. Перши идеї сом, нє будзеце вериц, находзел у турских серийох. Супруга провадзела дїю, а я шацовал їх хижи и мури. Вони наисце „махере” и за твердинї и за декорацию хижох. Кед ше чловек запатри, то наисце так – гвари Милан.

За мурованє єдного мурика длугокого 10 и високого 2 метери, Миланови и Предраґови потребне 10 днї, а кед хвиля красна можу закончиц и швидше. Док Милан мурує, Предраґ му шицки цегли пореже на одредзени димензиї. Медзитим, уж ше помали лапа и сам муровац.

– Вон би требал то предлужиц, док я уж нє годзен робиц, алє ище нє барз сце пойсц сам даґдзе муровац. Най себе найдзе двох пайташох, та най робя, бо людзе барз глєдаю. Кед бим нє робел у державней фирми, я би можебуц и постарчел, алє так нє можем. Ша дакеди ше случи же ноцами робим, а през дзень муруєм. Понукал сом и другим же их научим, алє ридко хто заинтересовани. За тото треба наисце видвоїц вельо часу, а нє мож анї вельо наплациц, бо людзе нє маю пенєжи. Прето велї майстрове думаю же ше нє виплаци робиц. Ниа, єден майстор вимурує хижу за 10 днї и вежнє 2 000 еври. А я, же бим ю цалу вимуровал и вицифровал, треба ми голєм два мешаци, а вежнєм исти пенєж. То ше наисце муши любиц – толкує Милан.

Гоч є по фаху тракториста, Милана ище давно братняци уведли до мулярскей роботи, а вон сам ше вше интересовал за таку файту креативного виражованя. Гвари же ноцами часто нє ма мира и нє може спац од бурї идейох, а за свой гоби часу пренаходзи и кед пада диждж. Теди ше завре нука, та прави декоративни предмети зоз древа, лєбо з металу.

И У ПРОСТОРИЙОХ МОТО-КЛУБА ОХАБЕЛ СВОЙ ПЕЧАЦ

Милан член коцурского Мото-клуба „Пеґасус”, и вон задлужени за нукашню и вонкашню декорацию кед у питаню мулярски роботи и вирабянє металних часцох. Тому пошвецел вельо свойого часу и енерґиї. Нукашньосц Клуба прекрашнє поробена, а Милан увагу пошвецел шицким детальом. Праве закончовал вонкашнї мурик и бину.

Клуб свой дзешати родзени дзень преслави у ушорених просторийох. Алє то нє готове, Милан и його колеґове з Клуба маю ище вельо плани за свойо просториї. Тераз нам их нє вивола, бо понагля, ознова зоз новим муриком ма украшиц єден зоз валалох у околїску.

DSC_0138

ПОВЯЗАНИ ТЕКСТИ