РУСКИ КЕРЕСТУР – На своєй порядней, штвартей схадзки у тим зволаню, Национални совит (НС) Руснацох всоботу, 28. марца розпатрал 28 точки дньового шору, найвецей бешедоване о звитох о роботи и финансийних звитох за прешли, та планох роботи з финансийнима планами за тото рок самого НС, як и установох хторим є снователь, лєбо соснователь. Поприношени и дзепоєдни одлуки вязани за одбори НС, за роботу подручних канцеларийох по местох, потвердзени одлуки Вивершного одбору НС медзи двома схадзками Совиту, одредзени места централней шветочносци означованя Националного швета Руснацох од 2016. по 2018. рок, дати два позарядово стипендиї штредньошколком, а бешедоване и о розполаганю з квартельом НС хтори ма у Новим Садзе.
На схадзки у просторийох керестурского Дому култури присуствовали 16 члени Совиту, понеже тройо оправдали одсуство, а крем у двох случайох – кед одлучоване о єдному членови Одбору за службене хаснованє язика и писма и о розподзельованю средствох за видавательну дїялносц по конкурсу Покраїнского секретарияту, шицки други одлуки на тей штвартей схадзки принєшени єдногласно.
По прилапеним финансийним звиту, у 2014. року НС од финансиєрох вєдно достал 13 милиони 799 673 динари, потрошени 13 милиони 341 788, так же на концу 2014. року на рахунку було 457 884 динари. Прейґ НС розподзельовани и пенєж за дзепоєдни нашо найзначнєйши манифестациї и прекладанє тестох за змаганя за основну и штредню школу достати од ресорних покраїнских секретариятох, цо вєдно було 598 378 динари.
З локалних самоуправох у хторих руски язик службени, од општинох Кула, Шид и Жабель и Городу Нови Сад НС вєдно були уплацени милион 760 324 динари, а розподзелєни су подручним канцеларийом и КУД у наших местох у тих општинох. Як гварел предсидатель Совиту Славко Рац, прешлого року купена и половка квартелю у Новим Садзе висудзеного од Еви Баран, а прейґ 530 000 динари дате РНТ „Петро Ризнич Дядя” за пририхтованє другей представи цо, як гварел, можебуц постанє и пракса понеже ресорни покраїнски секретарият остатнї роки Театру опредзелює пенєж лєм за єден проєкт. И Совит и його одбори сполнєли плановани роботи, а 2014. рок означели и виберанки за НС Руснацох, як и подписованє Спорозуменя о сотруднїцтве медзи АП Войводину и Пряшовским самоуправним крайом у Словацкей, гварел предсидатель.
Финансийни план за 2015. рок проєктовани на вєдно 12 милиони 987 016 динари, на основи уж достатих ришеньох од финаниєрох. Як наглашел Рац, понеже ше у тим року векшу увагу пошвеци и предшколскому образованю, Одбору за образованє за коло 300 000 дин. звекшани средства и плановани су на милион 880 000 динари. Одбору за културу плановани милион 700 000, Одбору за информованє 400 000, Одбору за службене хаснованє язика и писма 100 000, Роботному целу за младих 350 000, Роботному целу за науку 250 000, Роботному целу за спорт 200 000 и Пододбору за демоґрафию 100 000 динари.
У финансийним планє волонтерски додаток предсидательови ВО плановани за три мешаци, понеже би, накадзи дошлєбодза законски предписаня, вон познєйше мал прейсц на роботу до НС.