ВЕРБАС – По Одлуки Скупштини општини Вербас, у Явним подприємстве „Дирекция за вибудов” порушани поступок ликвидациї, а на основи скорейшого допису Министерства финансийох до Општинскей управи же тото подприємство вецей нє мож финансовац з буджету.
То значело же заняти плаци вецей нє можу доставац з буджету, алє их муша заробиц на тарговищу, медзитим, як визначел заменїк предсидателя Општини Милан Ґлушац, заключене же „Дирекция за вибудов” нє може успишно тарговищно дїловац.
После анализи и розпатраня ситуациї, одлучене же Подприємство войдзе до поступку ликвидациї, а дїялносц „Дирекциї” будзе преунапрямена до Општинскей управи. Так основане Оддзелєнє за будовательно комунални роботи, хторе може окончовац роботи ликвидованого Подприємства, окрем роботох планованя.
Заняти котри робели планску документацию прешли до ЯКП „Комуналєц”, а до Оддзелєня за защиту животного штредку змесцена Канцелария за енерґетски менаджмент.
ЯП „Дирекция за вибудов” робело 16 роки, од 1999. по конєц 2015. року.