Прешлого тижня Явне подприємство „Завод за вибудов” Кула у центре Руского Керестура, на самим початку Русинскей улїци и за „Мензу” положело знаки же ту тераз забранєне паркиранє превозкох, цо нєсподзивало Керестурцох. Бо, паркиранє забранєнє точно прейґ драги Здравственей амбуланти и апатикох, цо и найвекши проблем Керестурцом.
У центре вше вельки обток гражданох, та и їх превозкох праве пре Здравствену амбуланту, два апатики, меняльню, блїзкосц Дома култури, церкви, дзецинскей заградки и других змистох у центре валалу, а ту ше паркира превозки и кед свадзби. Роками ше ту зохабя авта, часто лєм пре конченє найнужнєйших роботох и предлужованє далєй, но указало ше же то „дзиви паркинґ”, на явней поверхносци, з хтору управя Явне подприємство „Завод за вибудов” Кула.
Знаки 28. юния поставени без знаня и пораду з Месну заєднїцу, лєбо керестурским ЯКП „Руском”, бо як управяч з явну поверхносцу, компетенциї над ню ма Општина, прейґ спомнутого ЯП „Завод за вибудов”.
Власнїк терашнєй „Мензи” ище у маю, пред керестурским Кирбайом, ту поставел цеглову подлогу за погосцительну лєтню заграду, хтора тих дньох и оградзена, та почала робиц. Такой по поставяню спомнутей подлоги Совит Месней заєднїци од општинских инспекцийних службох вимагал же би ше ю склонєло, праве пре нєможлївосц паркираня опрез Здравственей амбуланти. То нє зробене, алє у медзичаше поставени знаки за забранєне паркиранє, єден поконцу „Мензи”, з чим, практично, дошлєбодзена єй робота. Нє маю Керестурци нїч процив лєтнїх заградох погосцительних обєктох, ту у центре, дакус дозукос прейґ драги „Мензи” роби ищe єдна, другого власнїка, медзитим, найвекши проблем же ту було место за паркиранє кед ше ишло до лїкара. А звичайно там нє иду особи котри за даяке вельке шпациранє…
ВЛАСНЇК МА ДОЗВОЛУ
Предсидатель Совиту Месней заєднїци Руски Керестур Владимир Олеяр за нашо новини потвердзел же Месну заєднїцу нїхто нє консултовал о поставяню транспортних знакох о забрани паркираня:
– Тота забрана паркираня опрез Здравственей амбуланти направела вельки револт наших гражданох, на тим месце людзе роки паркую превозки кед приходза до Амбуланти, Церкви, Дому култури, Дзецинскей заградки, до центру вообще. Гражданє барз нєзадовольни и глєда ше даяке ришенє – гварел Олеяр.
„Руске” о тей теми бешедовало и з терашнїм власнїком погосцительного обєкту „Менза” Миланом Чавичом, котри наглашел же ма потребну дозволу за тоту лєтню заграду, алє и же є тиж нєзадовольни з тоту забрану паркираня.
– Кед дакому нє одвитує поставянє знака за забрану паркираня – то и мнє, бо госци котри приходза до мойого локалу, до „Мензи”, нє маю дзе паркирац авта! Цо сцеце вецей од того, то факт. Мнє то тиж нє одвитує як и другим, як и цалому валалу. Пре свадзби тиж так, бо салу видавам и за свадзби, и гоч вони нє так часто, теди єст и вельо вецей авта. Велї забрану повязую з мою лєтню заграду, но треба знац же и госци „Мензи” нє годни ту паркирац. То вообще нє будзе зґоднє, нє будзе им практичне зайсц и попиц пице, а авто зохабиц хто зна дзе – гварел Милан Чавич.
НЄТ ЗНАКА ДЗЕ ТЕРАЗ МОЖ ЗОХАБИЦ АВТО
Деян Алексич, у Заводу за вибудов Кула задлужени за транспорт и транспортну сиґнализацию, тераз на рочним одпочивку, а вязане за тоту тему нам гварел най ше обрациме до Кабинета предсидателя Општини Кула. Но, у терашнїм чаше рочних одпочивкох вецей податки о тим проблему тераз нє могло достац.
Познєйше вироятно будзе спатрене чи ту инґеренциї ма и општинска транспортна инспекция, понеже знаки за забрану паркираня поставени, алє нє и дзе воно тераз дошлєбодзене. Можлїве же то будзе з другого боку Амбуланти, алє там Огньогасни дом и треба места за виход огньогасного камиона… Аж єст и таки роздумованя же ше тот положени транспортни знак одноши на забрану паркованя на самей драги, а нє и коло драги, бо то на нїм нє пише.
СХАДЗКА О ДВА ТИЖНЇ
Вовторок, 5. юлия, мала буц схадзка Совиту Месней заєднїци Руски Керестур, дзе на дньови шор мало буц положене и розпатранє того найновшого проблему о забрани паркираня, медзитим, нє було кворума, та схадзка преложена за два тижнї. Вироятно после того ушлїдзи и даяка службена реакция Месней заєднїци, а Керестурци дакус у чуду же прецо тота забрана положена праве тераз, у сезони и лєтнїх заградох погосцительних обєктох. Бо, на другим боку, уж роками ше глєда поставянє забрани паркованя за вельки камиони на паркинґох у самим центре валалу, опрез крижней драги, з чим наисце барз загрожена безпечносц, алє знака за тото ище нєт.