СРИМСКА МИТРОВИЦА – Традицийна Шветочна академия „Мацери Рускинї”, як централна манифестация Руснацох у Сримскей Митровици, отримана пияток, 11. децембра пред полну салу з публику у Театру „Добрица Милутинович”, а у орґнизациї Подручней канцелариї Националного совиту (НС) Руснацох у Сримскей Митровици.
Програму з нашу шветочну шпиванку „Браца Русини” почала Мишана шпивацка ґрупа „Руски зарї”, а Академия цали час була попреплєтана зоз стихами з поеми „Мацери Рускинї” Гелени Гафич Стойков, хтори двоязично рецитовали Теодора и Ирена Ванчик, Милена Костич и Ивана Боґич. На клавиру их провадзела Тияна Бережни, а з писнями о Руснацох участвовали и старши рецитаторе Ясна Арбанас и Звонко Беднар.
Найвекши аплауз достали наймладши – дзеци и школяре котри виучую руски язик у нашей грекокатолїцкей церкви, а з котрима роби професорка руского язика Моника Абодї. Вони одрецитовали даскельо писнї и одмодлєли молитву „Богородице Дїво”.
Як госци на програми наступели члени КУД „Бранко Радичевич” зоз Сримскей Митровици, чий Ансамбл ветеранох одтанцовал „Танєц витаня”, и КУД „Яким Ґовля” з Миклошевцох, з Горватскей, чия шпивацка ґрупа одшпивала даскельо руски шпиванки, а танєчнїки одтанцовали два танци.
Дириґентка Шпивацкей ґрупи „Руски зарї” Даниєла Горняк, з провадзеньом Дзивоцкей шпивацкей ґрупи, на атрактивни способ виведла нашу нову популарну шпиванку „Червени жичмочки”, а на програми наступело и домашнє українске КУД „Коломийка” з єдну українску народну шпиванку.
На концу програми шицки учашнїки вєдно одшпивали єдну популарну войводянску композицию и „Многая лїта”, шицких шпивачох провадзел оркестер „Ходоба и приятелє”, а домашнї на концу подзелєли и подзекованя шицким котри помогли у витвореню Академиї. Конферансу по руски и по сербски водзели Анита Абодї и Владимир Крстич.
У мено орґанизатора, Душанка Чордаш Костич медзи госцами на Шветочней академиї окреме привитала заменїка предсидателя НС Руснацох Йовґена Мудрия и подпредсидательку НС Наташу Регак, котра на початку Академиї присутних привитала у мено Совиту.
Привитани и представителє Городскей управи за културу, спорт и младеж Сримскей Митровици, парох грекокатолїцкей церкви о. Владислав Варґа, медиї, числени спонзоре, як и патраче.
По Шветочней академиї друженє домашнїх и госцох предлужене у парохийней сали нашей церкви Вознесеня Господнього, дзе ше з найвекшей часци и сходза Руснаци у Сримскей Митровици.
